السلام عليكم ورحمه الله
في ليلة شتوية شديدة البرودة من ليالي المربعانية وفي الخيمة في جلسة احمدية وامام المشب والضو ما عندك احسن منها حصلت بعض الاعترافات الخطيرة والتي ربما نتجت عن كثرت شرب شاهي الزنجبيل بالحليب ( شاهي + زنجبيل + حليب ) والتلحف بالفروة والواحد ودك ما يتحرك او يفتح الفروة لا تهب علينا السموم من الفروة ما لكم بالطويلة في هذه الجلسة المخملية حصلت بعض الاعترافات من بعض الزقررت انهم سبق ان انجلدوا يعني اندبغوا وهذا شيء غير عادي والسبب ان الناس دايم تستعرض بطولاتهم ، يجيك الواحد مالي بطنه تسذب وبطولات ياما دبغ خمسة بالعجرى والسادس بغى يموت والله لو الناس ما فكوهم كان موديهم سرداب الشيعة والا يجيك واحد ليخ وعصاقيله كنها مساويك ويتغنى بدبغه لعشر افغانية وغيره من الاساطير المصاطيلية .
الاجواء في خيمتنا كانت غير فالاعترافات كانت حاضرة واتركم مع اول قصة وهي حقيقة والبهارات من عندي
يقول خوينا
كنت طالع من الدوام والنفس شينة مره وزحمات وغثى تعرفون الرياض اكيد ويجيك ذاك الليموزين يمشي طبلونه ويحدني ذيك الحده اللي يحبها قلبك يوم جاني الشيطان الله لا يعيده ويلعب علي ويقول الحقه تراه ليموزين وره الشغل المهم صدقت ولحقته وخذ يا تكبيس وبوراي يوم الليموزين شخط وانا الحقه واحده يوم لف ودخل حي جديد – ناويني الوسخ - يوم صرت اباريه بالموتر واثاريه باكستاني – بلاه ابيض ما هوب ادغم- وقصير على طول جا الشيطان وقال تراه ضعيف وقفه والزخه وعلى طول احده والزه على الرصيف وانزل بسرعة لمه والعن واسب واتفل وناوي شر اني ابلعن خامسه
يوم ينزل ذاك الباكستاني الطويل عريض المنكبين كنه الرجل الاخضر مدري شلون متسفط في الكامري وانا افكر بسرعة انحاش والا اتضارب معه بس حسبي الله على التفكير الغجري المداري الاستوائي قلت خل اجزم يمكن يذل واجيك اركض واطمر عليه يوم لقفني ومسكني من تحت آباطي ورفعني كني بزر وانا ادودل رجليني ثم نزلني على مستوى وجهه وجلس يطالعني والله تشم ريحه السويكه مع وشو الخياس حقهم من اثمه ثم عصرني ذيك العصره يوم شهقت ذيك الشهقة وابي انفس والنفس جالس في صدري عيى يطلع ويعصني ثانية يوم طلع شريط حياتي قدامي والظاهر اني ارتخيت من تحت ثم جدعني على الارض واحس اني في منطقة انعدام الوزن والجاذبية والدنيا مضلمه مره قلت اكيد بس القبر ما دريت الا هو كامشني من صدري ورافعني مره ثانية ثم تفل بوجهي الله يلعنه وبس اشوى صحصحت شوي وقربني لوجهه وقال والشرر يتطاير من عيونه مره ثاني ياهمار – حمار- انا افرم لهم – لحم- انتااا ثم جدعني على الارض وركب موتره ومشى طبعا الوسخ يوم يدخل حي جديد توه قايم ناويني علشان ما احد يفكه مني قصدي يفكني منه الوسخ بس خيره والا كان صرت مقطع بلوتوث .
قمت ما بين مصدق ومكذب واطقق ثوبي واجمع اغراضي وامشي للموتر تقل سكران واروح للبيت طبعااخوياي يوم شافوني تروعو وقالو عسى ما شر وجهك متغير قلت ابد تعبان وبغيت اصدم واشوى اني صرفتهم ورحت وماشوف قدامي الا الفراش وصكه نومه وانا منغبن
![Sad](https://2img.net/i/fa/i/smiles/icon_sad.gif)
بس تبون الصراحه انا استاهل هذي نهايت المهايط... وبعدين هذاك الشارع حرمت اطبه
ويالله ياحلوين الي تصطر وتفقع وجهه يسدحلنا سالفته فيذا !!! لاحد يستحي
.
وتقبلو تحيااااتي أخوكم
![king](https://2img.net/i/fa/i/smiles/icon_king.png)